ОБУКА, ПРЕКВАЛИФИКАЦИЈА ИЛИ ДОКВАЛИФИКАЦИЈА

Едно од правата на осигурување во случај на невработеност е правото на подготовка за вработување, односно обука, преквалификација или доквалификација.

Начинот, условите и постапката за остварување на ова право на осигурување се уредени со Правилникот за обука, преквалификација или доквалификација на невработени лица и други лица (Сл. Весник на РМ бр. 30/2001, 24/2005 и 146/2007).

Покрај невработените лица, ова право може да го остваруваат и работници на кои работниот однос ќе им престане по основ на економски, технолошки, структурни или слични промени.

За реализација на програмата за подготовка за вработување Агенцијата за вработување доделува паричната помош во висина од 4.000,00 денари месечно по невработено лице односно работник и партиципација во трошоците за изведување на подготовката за вработување на работодавецот во висина од 2.000,00 денари месечно по невработено лице односно работник.

Времетраењето на обука, преквалификација или доквалификација се утврдува врз основа на извршена анализа на конкретните работи и работни задачи во занимањето, за кое се обучуваат невработените лица односно работниците, при што обуката и преквалификацијата не може да траат повеќе од 3 месеци, а доквалификацијата подолго од 1 месец во исто занимање (образовен профил), односно не подолго од 2 месеци во иста струка.